டுபாக்கூர் இன்பாக்ஸ்

பதிவுலக நண்பர்களின் வளர்ச்சி அவ்வளவு சந்தோஷமான விஷயமாக இருக்கிறது. லக்கிலுக் புத்தகங்கள் எழுதித் தள்ளுகிறார். கார்க்கி குறும்படத்தில் நடிக்கிறார். தாமிரா வலையுலகிற்கு வந்து நாளையோடு ஒருவருடமாகப் போகிறது. ஒருவருடத்திற்குள் அச்சு இதழில் கதை வெளிவந்த சந்தோஷத்தில் இருக்கிறார். இன்னும் பல எழுதி அனுப்பி பதிப்பாளர்களை ‘கிர்ர்ர்ர்ர்’ரடிக்க வைத்திருப்பதாகக் கேள்வி. அண்ணாச்சி வடகரை வேலன் அச்சில் கதை எழுதி, கவிதைகளும் எழுதிக் கொண்டிருக்கிறார். நர்சிம்.. சொல்லவே வேண்டாம். கதைகள் மட்டுமின்றி ஆக்கபூர்வமான செயல்கள் பலவற்றிலும் ஈடுபட்டு வருகிறார்.

எல்லாவற்றிற்கும் மகுடம் போல அண்ணே அப்துல்லா சொல்ல சொல்ல இனிக்கும் படத்தில் பாடல் பாடியுள்ளார். செல்வேந்திரன் விஜய் டி.வி-யின் நீயா நானாவில் சிறப்பு விருந்தினராக (பங்கேற்பாளராக அல்ல.. சிறப்பு விருந்தினராக!) பங்கேற்று விரைவில் அது ஒளிபரப்பப்பட உள்ளது!

சரி.. இந்த ரேஞ்சில் போனால் இவர்களைப் பற்றி – இன்னும் சிலரைப் பற்றியும் - என்னென்ன நியூஸெல்லாம் வரும்?

ஆனந்தவிகடனின் இன்பாக்ஸ் பாணியில் எழுதப்பட்ட (அத நாங்க சொல்லணும்டா!) ஒரு கற்பனை...
-----------------

தனது ராவணன் படப்பிடிப்பில் பிஸியாக இருக்கும் மணிரத்னம் அடுத்த படமான அசோகவனம் படத்தின் திரைக்கதையை எழுத நேரமில்லாததால் அதற்காக பலரையும் தேடி இறுதியில் யுவகிருஷ்ணா என்பவரிடம் அந்தப் பொறுப்பை ஒப்படைத்துள்ளாராம். லக்கிலுக் என்ற பெயரில் பிரபலமான வலைப்பதிவரான இவர், கலைஞர் வரும் தேர்தலில் எம்.எல்.ஏவாக தன்னை நிறுத்தவிருப்பதால் எழுத்துப் பணியில் கவனம் செலுத்த முடியுமா என முதலில் தயங்கினாராம். பிறகு தன் தலைவனின் பாணியில் தூக்கத்தைக் குறைத்துக் கொண்டு எழுத்தையும் அரசியலையும் ஒருசேர கலக்கப்போவதாகக் கேள்வி!

ஏ.ஆர்.ரகுமான் ஹாலிவுட் படத்திற்கு இசையமைப்பது தெரிந்ததே. அதற்காக சிறப்பான ஒரு குரலுக்காக காத்திருந்த அவர் விமானப்பயணத்தின் போது தன்னுடன் பயணித்த மகேஷ் (இவர் துக்ளக் என்ற பெயரில் வலையில் எழுதிவருபவர்) ஐபாடில் ‘காதலொரு பள்ளிக்கூடம் நண்பா’ என்ற பாடலைக் கேட்டு அந்தப் பாடகர் அப்துல்லாவை தேர்வு செய்து தன்னோடு ஹாலிவுட் அழைத்துச் செல்ல உள்ளாராம். ‘தொடர்ந்து ஆஸ்காரை அள்ளும் இந்தப் பாடல்’ என்று சில வட்டாரங்கள் தெரிவிக்கின்றன.

ஷங்கர் தயாரிப்பில் அடுத்த படத்தை இயக்கப்போவது ஆதிமூலகிருஷ்ணன் என்ற புதிய இயக்குனராம். ‘நடிப்புப் புயல் கார்க்கி’ ஹீரோவாக நடித்தால்தான் இயக்குவேன் என்று அவர் சொன்னதால் அதற்கும் ஷங்கர் ஒப்புக்கொண்டாராம். (இவர் உடனே ஓகே சொன்னதற்குக் காரணம் கார்க்கி நடித்த ‘நீ எங்கே’ என்ற காவியம் என்பது குறிப்பிடத்தக்கது) விரைவில் வெளிவர இருக்கும் இந்தப் படத்தை பலகோடி ரூபாய்கள் செலவில் உருவாக்க அவர் திட்டமிட்டிருக்கிறார். ‘ஒரு டைரக்டரா, ஆதிமூலகிருஷ்ணன்-ங்கற பேர் ஓகேவா?’ என்று பார்ப்பவர்களிடமெல்லாம் கேட்டுக் கொண்டிருக்கிறார் ஆதி!

எப்போது பார்த்தாலும் ஜெனிவா, இந்தியா என்று சுற்றிக் கொண்டே இருப்பதால் தங்கள நாட்டு சுற்றுலாத்துறை சிறப்பு ஆலோசராக இருக்க முடியுமா என்று ‘துக்ளக்’ மகேஷைக் கேட்டுக் கொண்டிருக்கிறது சிங்கப்பூர் அரசு. தீவிர ஆலோசனையில் இருக்கிறாராம் அவர்.

விஜய் டி.வி-யில் நீயா நானா நடத்தும் கோபிநாத் வேறு பல நிகழ்ச்சிகளிலும் பிஸியாக உள்ளதால் திறம்பட அதை நடத்த வேறு நபரை தேடிக்கொண்டிருந்ததாம் தயாரிப்புத் தரப்பு. சமீபத்தில் அந்த நிகழ்ச்சியில் கலந்து கொண்ட செல்வேந்திரன் கோபிநாத் போலவே அழகாகவும், அவரைப்போலவே தங்குதடையில்லாமல் பேசுபவராகவும் இருப்பதால் அவரைத் தேர்வு செய்துவிட்டது. கோபிநாத்தின் ‘கோட்’ இவருக்கு ’சூட்’டாகும் பட்சத்தில் உறுதியாக இவர்தான் அடுத்த விஜய் டி வி ஸ்டார் என்று நம்பத்தகுந்த வட்டாரங்கள் தெரிவிக்கின்றன.

மலையாளப் படவுலகில் ஷகீலா நடிப்பதைக் குறைத்துக் கொண்டபிறகு அந்த மாதிரிப் படங்கள் சரிவர ஓடுவதில்லையாம். என்ன செய்யலாம் என்று ஆலோசனைக் கேட்டு அதிஷாவைத் தேடி மலையாளப் படவுலகமே திரண்டு வருகிறதாம். ‘என்னாங்கடா நெனைச்சுட்டீங்க என்னை?’ என்று கோபமாக அவர்கள் கண்ணில் படாமல் ஜோதி தியேட்டரில் போய் ஒளிந்து கொள்கிறாராம் இவர்!

தமிழக அரசின் இயல்இசைநாடகத்துறைத் தலைவராக நர்சிம் தேர்ந்தெடுக்கப்பட்டிருக்கிறார். கம்பனைப் பற்றிய இவரது பதிவுகளை கலைஞரின் கவனத்துக் கொண்டு சென்ற சிலரால்தான் இந்த பதவி கிடைத்ததாக மகிழ்வுடன் சொல்கிறார் இவர்.

கொசுறுச் செய்தி 1: கேபிள் சங்கர் இயக்கப்போகும் படத்தில் நர்சிம்தான் நாயகன்! ஷங்கர் தயாரிப்பில் இயக்க கதை சொல்ல கேபிள் சங்கர் சென்ற போது ஆதிமூலகிருஷ்ணனின் கதை ஓகே ஆகிவிட்டதை அறிந்த கேபிள், தற்போது விகடன் டாக்கீஸின் தயாரிப்பில் இயக்கும் இந்தப் படம் ஆதியின் படம் ரிலீஸாகும் அதே தேதியில் ரிலீஸாகிறதாம்!

கொசுறுச் செய்தி 2: ஆதிமூலகிருஷ்ணன் படத்தின் பாடல்களை எழுதப்போவது வடகரைவேலன் என்றறிந்ததும் கேபிள்சங்கர் தரப்பு நவயுவக்கவிஞர் அனுஜன்யாவை வளைத்துப் போட்டு பாங்காக் பறந்து பாடல்வேலைகளை ஆரம்பித்துவிட்டதாம்!

டாஸ்மாக்கில் நடக்கும் அத்துமீறல்களையும் ஊழல்களையும் தடுக்க முடியாமல் திணறிக்கொண்டிருக்கும் அரசு, இறுதியாக ரகசிய முயற்சியில் இறங்கியுள்ளது. ஈரோட்டைச் சேர்ந்த வால்பையன் என்பவரிடம் தமிழக டாஸ்மாக்குகளில் நடக்கும் முறைகேடுகளைப் பற்றி அலசி ரிப்போர்ட் செய்யும் பொறுப்பை ஒப்படைத்துள்ளதாம்!

அதேபோல அரசு மருத்துவமனைகளின் சுகாதாரமற்ற தன்மை குறித்து அரசுக்கு பல புகார்கள் வந்ததைத் தொடர்ந்து ப்ளீச்சிங் பவுடரை சிறப்புப் பார்வையாளராக நியமித்து உத்தரவிட்டுள்ளது. (ஒரே நேரத்தில் இருபக்கமும் ஆய்வு நடத்துவது எப்படி என்று வாப்ல்ளீபைச்யசிங்ன் குழம்பிப்போயுள்ளாராம்!)




.